英國前首相馬卓安嚟香港睇欖球賽之餘，免不了都要搵個場合發表吓政見。八方噚日見佢去英商會午餐會演講時就非常風騷，大講笑話。
佢話自己三十年前首次踏足香港，住喺當時已經非常著名的文華東方酒店。佢重記得有一日在酒店餐廳食午飯，隔籬枱坐咗一班美國人，食相非常趣怪，一隻手舉高隻生蠔，另一隻手用匙羹將生蠔同個殼分開，然後擘大個口，等隻蠔由高處跌落個口入面……結果，一隻跌咗去膊頭，另一隻跌咗落衫袋，呢個情景令馬卓安至今難忘。
講到外交關係，馬卓安又講了另一個故事，佢記得當時蘇聯的戈爾巴喬夫尚在其位，有一晚馬卓安同佢食飯時講到究竟邊個國家的人民比較有耐性，戈爾巴喬夫話蘇聯人成日要排隊買麵包，有一次有個男人覺得自己已經等咗好幾日，等夠了，要去殺戈爾巴喬夫。兩日後，呢個男人又再返麵包舖排隊，有人問佢係咪已殺咗戈爾巴喬夫？誰不知佢竟話冇，因為殺戈爾巴喬夫條隊重長過呢度好多！
（圖）馬卓安雖然已經唔再係英國首相，但仍然有不少Fans，午餐會有好多人輪流搵佢簽名。 凌樹輝攝
E-mail：