唔知係咪財爺蜜運沖喜，定係滙豐（005）調高今年香港經濟增長？淡友噚日手軟軟，但好友亦不思進取。雖然噚日外圍美股期指略為造好，但其實冇太大啟示，港股牛皮悶到暈，恒指最後跌26點，收10836。不過期指未平倉合約仍超過3萬張，好淡可能今日先決戰。
政府早排先叫公司咪亂裁員，電盈（008）噚日即刻剃眼眉。趙飛雲覺得香港公司愈嚟愈美國化，有錢一定要賺到盡，管理層只需要向股東交代，僱員不過係生產工具，唔使理佢哋感受，社會責任更加無謂提，唔該政府搞掂佢。怨氣積聚得太多會爆炸，對任何人都冇益。
經紀老友約飲下午茶，由電盈講到香港上市公司管理層，大家都覺得管理層質素最重要，所以趙飛雲鍾意新地（016）。老友叫筆者遲啲留意吓隻光通數網（155），佢話新老闆陳先生係叻人，唔單止識做股票，另外私人重搞生化等高科業務，同目前光通數網嘅高科業務幾配合，如果下一浪炒生化，可以憧憬吓。佢重話雖然目前公司水緊，但內地光纖資產相當值錢，如果今次供完股可以解困，應該前景唔差。
講起前景，港股近排一潭死水，主要就係搵唔到一啲前景突出嘅龍頭股。