由於要方便滑雪，所以要獃在同一間酒店三、四天，雖然日頭有得滑雪，夜晚有得浸溫泉，但始終有點「困」的感覺。有見及此，一早已向大師兄陳輝虹攞定料。
有必要先介紹一下輝虹，他除了是一位實幹的管理人員之外，實際上亦是一位暗藏的享樂主義追求者，並不是追求奢華，只是追求快樂。輝虹對北海道很熟，當得悉我們的行程之後，輝虹隨即傳真了一張手繪的地圖過來，詳細地解釋了酒店附近必去、應去及可去的食肆及店舖，每間食肆還有備註，列明了必吃、應吃及可吃的食物種類及價錢。此圖在手，天下我有，一連數晚由我帶隊，按圖索驥，食到好嘢的命中率高達九成。只可惜《飲食男女》內的專欄現只容許我寫本港食肆的資料，否則將此搵食地圖公諸同好也是一件美事。
輝虹與我曾是親密戰友，今日是好朋友，對我的個性有充分了解，所以所提供的旅遊貼士非常深得我心。攞旅遊貼士最怕問錯人，有時我想去齋瞓幾日舒服覺，你就教我唔好蝕底，每朝五點起身睇名勝，我當係草，你當係寶。
其實輝虹重有好多精選地點介紹過畀我，遍布亞洲、美洲與歐洲，只不過錢可以搏命搵，假可以搏命儲，但好伴難求，總不成與大嚿祖兩人浪漫地飲香檳、坐熱氣球睇日出，真係諗起都覺得把鬼。