地產代理發牌制嘅3年過渡期響去年底完結，地產代理監管局公布，未能過渡嘅持牌人共有1530人。同時，去年底共有14823個牌照屆滿，但有2387個冇續牌，流失率為16.1%。
地監局統計又指出，去年約有3000個業外人士考取代理資格，呢批持牌人隨時可入行，成為生力軍。
可能有見地產代理大歎生意難做，地監局響最新一期刊物內，為代理業指點迷津，指香港為國際都會，不少外地人士來港工作，對於選擇居住地點、為子女尋找學校、以及生活所需的其他方面都需要協助，這些遷移服務(relocationservices)，是地產代理可發展嘅新領域。唔知地產代理老闆對地監局嘅建議又點睇呢？
復活節就到，又係發展商促銷貨尾同商場嘅時機，長實(001)就響今日公布，長沙灣泓景臺，聯同黃埔新天地嘅十幾間食肆，響4日復活節搞「美食大召集」，屆時市民有機會品嘗城中熱門美食，同行亦要加把勁啦。
另外，信和嘅大角嘴奧海城商場，復活節假期節目天天新款，以吸引市民順道睇樓。
近年因為多咗銀主貨透過拍賣方式出售，代理公司同測量師行都力谷拍賣部，利嘉閣測量師行中環總行今日開幕，重話係全港最大嘅拍賣場。
蘭西