早陣子，亞Mark聽聞日本萬事得車廠，經已安排世界各地傳媒，到意大利測試全新Mazda6車系；據知新車獲得唔少車評人嘅高度評價，並被認定係該廠21世紀嘅至佳傑作之一。部車點好？除咗賣相予人有耳目一新之感外，當中至大轉變會係一個全新底盤結構，聽講話唔止柔韌富支持力，走彎時重好有歐洲車嘅出眾循迹性㖭；咁又難怪佢哋視Mazda6會係豐田Altezza（即港版凌志IS200），甚至係寶馬3系同平治C-Class嘅對手啦！
但至今香港代理至頭痛嘅，除咗係Mazda6嘅定價外，佢哋重好擔心會有水貨車行打主意，響日本搶先引入Mazda6嘅2.3V6型號咁話；之不過，亞Mark就認為若然有水貨車行睇中Mazda6的話，亦即代表萬事得汽車嘅革新成功，可看成市場認定新車嘅存在價值㗎！