陳冠希日前因涉嫌與一宗毒品案有關，主動聯絡海關接受調查，最後以一千元保釋。昨日他就此事召開記者會，表示曾收到一個陌生人由海外寄來的郵包，郵包內有類似煙絲的物體，但強調自己從未吸過毒。
有消息指陳冠希較早前曾就一宗毒品案主動聯絡海關協助調查，案中並有一名二十一歲的陳姓男子暫時獲准以一千元保釋候查。而陳冠希並沒有因此事而影響日常工作，前晚他出席完在深圳舉行的《第二屆音樂風雲榜頒獎禮》後，昨日下午三時他又聯同吳彥祖及李心潔齊齊出席電影《想飛》宣傳活動。
不過，陳冠希昨日下午一時在代表律師周小姐及MusicPlus唱片公司高級總經理甘菁菁陪同下，在中環麗嘉酒店就有關毒品案件召開記者會。而陳冠希的父親陳澤民、母親、兩位胞姊Olivia與陳見飛及經理人公司JCGroup行政副總裁蘇倫，皆有出席。
陳冠希甫到場坐下即交代事情始末，他說：「首先今日開呢個記者會，係我覺得今日嘅新聞影響自己形象、人格、品德，喺三月十三日郵局寄咗張收郵包嘅通知書畀我，不過就串錯我個名，我個陳字嘅串法係Chen，但佢串咗Chan，地址嘅number都錯咗，唔知點解可以寄到嚟我屋企。
「郵包喺外地寄嚟，寄畀我嗰個人有署名，但我唔可以講出嚟，我完全唔識佢。我嗰時唔喺香港，所以司機幫我去郵局攞，有兩個海關叫佢去後面打開個郵包，入面有朱古力、CD同一包類似煙絲嘅嘢，之後海關要求上我屋企搜，有七個海關人員好有禮貌、好專業咁去搜間屋，搜到連衫同底褲都搜埋，但乜都搜唔到。前兩日我返到香港，主動去海關協助佢哋調查，答晒問題後，一千蚊（元）擔保放咗我出嚟。
「其實平時都會有大陸同澳洲嘅fans寄信畀我，今次件事我唔會去諗邊一個做，亦唔知係咪有人想害我、玩我，如果係都冇得阻止。噚日我同記者講話冇呢件事，因為我問過律師，呢件事正在調查中，佢哋認為我唔應該去交代。我梗係有因為呢件事唔開心，擔心亦有少少，但自己都冇做錯，好無辜，好彩經理人同唱片公司都完全支持我。」
陳冠希續說：「我從來冇吸過毒，如果爹哋喺屋企，我都唔敢食煙，驚佢鬧我。我唔會追究呢件事，留返畀海關自己調查，我早兩日（大前日由日本）返香港，海關有搜我嘅行李，底衫褲乜都搜晒，亦有搜身，當然乜都搜唔到。海關冇要求我唔好離港，噚晚我都去咗深圳做嘢。
「屋企人都好支持我，平時我唱歌同有首映佢哋都會出席，我好開心佢哋今次都咁支持我。佢哋知我係乜人，調查完件事亦可以證明我嘅清白。
而陳冠希母親和兩位胞姊陳見飛及Olivia，昨日下午亦有出席陳冠希《想飛》的宣傳活動。現場所見，陳冠希心情未有受毒品案件影響，與現場觀眾玩遊戲時表現得非常投入，有講有笑。
此外，陳冠希的母親透露自己是專程由溫哥華返港支持愛子，問她可有為陳冠希擔心時，陳母說：「都唔係事實，唔使擔心。」陳冠希在記者會上表示自己平日在家連食煙都怕父親鬧，記者問陳母在她心目中陳冠希是否乖仔，她說：「係吖！屋企家教不嬲都好嚴。」
採訪：馮美茵 攝影：陳烱威、陳志嵐