上周六小初去珠海打波，撞到細姪女外資大行分析員Amy。
小初見到佢，當然問佢有咩心水，佢就話有同事推緊隻中信嘉華銀行（183），佢話嘉銀自從收購華人銀行後，陸續都有動作，例如同中信泰富（267）合作大搞金融業務，另外喺信用卡甚至私人銀行業務方面都積極發展，所以有留意價值。
雖然小初見到嘉銀股價由舊年底2元水平起步，升浪一浪高於一浪，但近排在2.50元水平沽壓唔細，或者係有獲利盤回吐，不過中長線則有得諗。聽講嘉銀今日好似有個酒會，成班老總落晒嚟，唔知班中資炒家會唔會炒高賀一賀呢？
講完大路銀行股，小初又想講吓隻金衛醫療（8180），隻股自舊年年底上市以來，股價一直只升不跌，上周五又升近10％，收1.85元。經紀黃話，成班大陸炒家基本上都冇散過貨，要升幾多有幾多。
慕容小初