宣萱與古天樂及羅嘉良的友情，始於約十年前。工作上，宣萱與撈家合作拍過五套劇集，與古仔則拍了六套，所以宣萱提起這兩個男人，不禁哈哈笑說：「我一生嘅演藝生涯都奉獻晒畀佢兩個，但同佢哋合作係非常好，私底下佢哋亦都係好有情義嘅朋友。」
記：古仔對你點樣有情義？
宣：佢係一個好有義氣嘅人，我有事，佢會主動幫我，好似以前試過有一本周刊寫咗我一啲唔屬實嘅嘢，係乜事我都唔記得咯，嗰日同古仔一齊坐喺車入面，佢第一時間攞起電話，打畀嗰間周刊一個相熟記者，佢話點解你寫宣萱呢啲嘢，佢講完電話之後，同我講話人哋肯畀番一個封面我去澄清番件事，但我話算啦，唔想搞大件事。我多謝佢㗎，當時我好感動，人哋盡咗能力幫你，你唔開心，有麻煩嘅時候即刻企出嚟維護你，睇到古仔係有義氣嘅。
記：撈家對你又點？
宣：撈家係好好嘅人，佢會好維護啲朋友，幫你好冷靜咁去解決問題，呢啲人已經好難搵。早排我撞車入咗將軍澳醫院，當時因為我男朋友唔想遇到啲記者，我哋就商量不如搵一個地方再傾，撈家住喺清水灣，佢又有車，咁理所當然就係搵佢啦，我記得嗰日係一朝早，我打電話畀佢嗰陣時，撈家重瞓緊覺，你知撈家有幾多時間瞓覺㗎啦，但佢一啲都冇猶豫，即刻話『我即刻嚟，係咁，拜拜』。唔係當你係好朋友嘅話，人哋睬你都儍啦，瞓多兩粒鐘唔好咩？
記：你點樣同佢哋維繫到咁多年嘅友情？
宣：要睇雙方嘅本質，每個人都會長大，會不停咁變，佢哋係睇到我向好嘅方面變，佢哋希望幫我，一路向好嘅人生進發。
記：咁你係咪對佢哋都一樣咁有義氣？
宣：做朋友講義氣係基本嘢，我覺得有啲朋友未必成日見，古仔好忙，我私底下一年可能見佢三、四次，但大家個心明白，總之古仔同撈家有乜事發生，我幫到嘅，一定會盡力幫。