佘詩曼（阿佘）、胡楓、郭晉安、吳美珩同姚瑩瑩等，噚日齊齊去荷里活廣場出席《情牽百子櫃》嘅「健康大測試活動」，其間阿佘同瑩瑩更着上「肥仔裝」大玩平衡木，惹嚟幾百名市民圍觀。
喺活動上有一位中醫師幫演員把脈，結果中醫認為年紀最大、已年屆七十歲嘅胡楓同靚女姚瑩瑩最健康，而近期體重驟跌六磅嘅阿佘則身體最差，阿佘話：「我唔夠瞓，捱更抵夜，媽咪又喺美國，冇湯水飲吖嘛。」
另外，阿佘承認最近買咗價值四十五萬嘅新Benz，但因為以前撞過車，而噚日又天雨路滑，阿佘為小心起見所以冇揸車，寧願坐公司車等接送。
周星馳同寰宇老闆林小明拍完《少林足球》，因為呢部戲嘅利益問題，互發律師信告對方，但噚日又有報道話星爺一陣話告，一陣又話唔告。不過馮仁昭了解過後，星爺的確有發律師信畀寰宇，佢根本冇講過話唔告，只係佢助手同記者話星爺係講笑。星爺告寰宇呢單嘢，已交畀律師搞緊。
以前同美女李嘉欣拍過拖嘅靚仔男模陳平治（Perry）平日都好鍾意蒲吧。
馮仁昭啲朋友有幾次撞見佢，都見佢一個人喺蘭桂坊嘅酒吧飲嘢，但佢蒲親吧總係表情落寞，企埋一邊睇人跳舞。
通常啲女仔見個咁憂鬱嘅靚仔飲悶酒，就會主動同佢傾偈，所以Perry單靠個靚仔樣蒲吧，已經識到唔少女仔。
港姐出身嘅無綫花旦，呢排是非都唔少，馮仁昭一早都聽過無綫有好多花旦唔鍾意佢，話佢好扮嘢，又識得同知名度高過佢嘅男星傳緋聞上位。
呢位扮嘢花旦早排同才子演員拍過拖都唔係乜嘢秘密，佢早排接受訪問同記者講過嘅嘢，後尾又反口唔認，重要周圍同啲圈中人講俾人屈，又真係幾好嘢，唔怪得之佢喺無綫冇乜朋友啦！
年輕偶像歌手同大過佢嘅天后歌手拍拖後，初時聽佢對女友講嘅愛嘅宣言，唔少人以為佢好情深，點知佢又搭上另一位靚女歌手，呢位靚女歌手早排同歌星男友分手後，火速同另一位歌星拍拖，點知𠵱家又搭上年輕偶像歌手，不過年輕偶像歌手其實專追啲有分量女歌星，係想幫自己上位。
今年氣勢好勁嘅天后女歌星片酬愈嚟愈勁不特止，佢嘅經理人氣燄一樣嚇親人，話說最近有一位演而優則導嘅男星要開戲，女主角想搵天后女歌星做，點知同佢經理人傾時，佢經理人話天后女歌星今時唔同往日，垃圾劇本就唔好浪費大家時間，又話大把大導演排隊等天后女歌星開戲，激到個男星導演當堂嬲爆爆走人。
馮仁昭有日喺中環食飯，咁啱撞到將為人母嘅李敏同佢老公李進。馮仁昭見到腹大便便嘅李敏行起路嚟唔多方便。女人陀仔咁辛苦，最好嘅補償就係得老公錫。馮仁昭成餐飯見到李進都係拖住老婆隻手，又細心夾餸畀老婆食，𠱁得大肚李敏好鬼冧。