古天樂羅嘉良無綫高層撐腰<br>宣萱靠小圈子做一姐

古天樂羅嘉良無綫高層撐腰
宣萱靠小圈子做一姐

無綫一姐宣萱與古天樂、羅嘉良及無綫兩大高層梁家樹和蕭笑鳴夫婦,這個五人組合近年一直被傳為在無綫玩「一家人」的小圈子,有人指宣萱亦是靠埋堆,才能做一姐兼屢獲機會演重頭劇。宣萱自己也不諱言,她確實找到了娛樂圈中的父親和兄弟。

事業篇:要埋堆講緣分
近年在無綫內部流傳着一個傳聞,指宣萱、羅嘉良(撈家)、古天樂(古仔),以及無綫戲劇分部助理總監梁家樹(Tommy)與其身任藝員科經理的太太蕭笑鳴,大玩「一家人」小圈子,更指宣萱是靠埋堆才能屢獲拍重頭劇的機會,鞏固其無綫一姐的地位。

梁家樹Buy我
自言笑罵由人的宣萱,表示過去曾多次在別人口中聽到這傳聞,她笑哈哈地說:「我從來冇諗過呢個問題,亦唔會去諗我哋五個似唔似一家人,但人哋要叫我哋做『一家人』,咁咪一家人囉,我又唔會理嘅。」
記:記者 宣:宣萱
記:你知唔知有人話你哋五個人喺TVB玩小圈子遊戲?
宣:我係有聽過嘅,但我絕對冇呢種心態。喺TVB嘅四樓,戲劇組嘅每一個監製都有自己鍾意用嘅演員,我承認Tommy對我好,佢同我講過,佢buy我係因為鍾意我個人夠直,好坦白,喺娛樂圈已經好少見。佢肯用我,都要我有實力至得,我今時今日得到嘅嘢,唔可以話係因為Tommy錫我,畀晒所有最好嘅嘢我,我就會得到,我自己都要付出努力,我冇觀眾緣,唔勤力嘅話,你畀乜嘢我都係冇用。

啱傾嘅好朋友
記:有傳你同高層玩埋堆,至可以有演重頭劇嘅機會?
宣:Tommy係一個超級好嘅人,我同佢係一種緣分,佢教我好多嘢,私底下大家係好朋友,啱傾嘅,可能喺某啲人眼中,好傾啲就話有埋堆嘅感覺,但我唔會理,所以我唔會因為人哋講呢啲嘢,而唔同佢做好朋友,我行得正企得正。
記:但係有人覺得你同Tommy兩公婆親到好似契爺契媽咁。

懶理閒言閒語
宣:講囉,我都係唔會理,控制唔到㗎,我視Tommy為好朋友之餘,佢畀我嘅感覺,就好似喺娛樂圈中搵到我嘅爹哋咁,我哋好似兩父女,佢唔會利用我,佢只係真心希望宣萱好,等如爹哋想每個仔女好一樣,我唔理人哋把口點講,永遠都唔會避忌嘅。
記:你同羅嘉良、古仔嘅關係又點?
宣:係兄弟姊妹,古仔雖然細過我少少,但我都當佢係哥哥㗎,佢會教我嘢。撈家就更加似哥哥啦,因為撈家比我成熟同冷靜得多。
撰文:朱芷瑩 攝影:馬啟然
協力:羅慧敏 鳴謝:香港國際潛水俱樂部