喺99年曾叱咤一時嘅光通信國際（603），雖然喺網絡泡沫爆破後已打回原形，累到好多投資者損手，就連「小小超」都喺呢隻股high咗唔少嘢，不過由於呢隻股喺賣殼畀日本仔之後，完全未注過資，業務都無點郁過，所以對於好多有心求殼嘅人嚟講，重係一隻好「乾淨」嘅殼股。
伏勝最近聽班大戶講，知道有條做天然氣生意嘅線想買殼注資上市，為咗想隻股可以鹹魚番生，重特登做埋月老，將位有心人同大股東拉埋，希望佢哋坐低可以有偈傾。雖然佢哋唔肯公布幾時會傾得掂，不過睇雙方嘅反應，似乎都係好事近。
市場上更有行家指出，隻股已安排好喺4月初公布注資方案，重話到時個價分分鐘會升幾倍，真係信不信由你。
雖然話個市唔係跌得好勁，不過上個禮拜有好多隻股仔俾人質冧個價，似乎重有啲有心人想借勢搵食，投資者買着呢啲股仔嘅話，真係有得震冇得瞓。
不過就唔係所有股仔都冇得諗嘅，就好似舊年8月同樣受到大迫倉嘅啟祥集團（632），近排個價就好努力咁擒番上嚟，上個禮拜最高重見過0.285元，成交股數在上兩個禮拜企喺5000幾萬樓上，以走勢嚟睇似乎係有啲料到。
聽上次有份幫手諗計將間公司重組嘅朋友講，呢隻股仔前景會好掂，事關佢哋已經斟緊賣殼畀國內嘅主要運輸單位，希望將一部分物流業務放入啟祥裏面，令到呢隻股仔有機會翻身。
據佢哋講，為咗要避開進行特別股東大會通過注資嘅麻煩，所以會先將隻股增肥先，目前要增磅嘅目標，聽聞係5毫呢個水平，不過唔知個市到時會點樣去睇呢件事呢。