我哋係凡夫俗子，見到一啲尊貴議員，當然要敬而畏之，或者敬而遠之。呢日晚飯之際，大家只談風月。平時與官府衙門（包括立法會）有聯繫之物流N飲咗兩杯紅酒之後，似乎苦酒滿杯，不吐不快，大家於是齊齊谷佢噴苦水，一噴就不可收拾。
物流N話：「老細要我逐個議員拜會，邊度有咁多時間吖，唔使辦正經事咩，諗嚟諗去，打電話去逐個傾，態度友善，同情我哋嘅，我一一多謝、非常謙虛。一啲口氣冷冰冰嘅，我立即約時間上去拍門。啲大佬好難約㗎，上到去就扮矮仔，其中一位似街頭大漢，粗聲粗氣，指住我嚟教訓，嘩，老竇老婆老闆都未試過咁樣向我指手篤腳，尊貴的議員點解咁似爛佬罵娘個款嘅？惟有忍氣吞聲、柔聲解畫，但佢又似初中程度，講極都唔明，哎吔，啲選民點解會選到呢類人做議員㗎，想極都唔明。」
街頭議員如此，富貴議員又如何呢？物流N話：「擺款囉，佢完全明白我哋嘅苦衷，但暗示一定要我哋大老闆親自去見佢。唉！為求議員一票，大老闆點唔得閒都要出馬啦。」有票在手，自然高人一截，零舍威風，唔怪得咁多老友恨做議員，不過坐上高位，係唔係更要謙厚啲先至襟撈呢？有風駛盡𢃇，唔敢話唔啱，不過山水有相逢，佢哋都要諗清楚下屆落選後，香港世界真正小小小。