特首董建華搞完競選連任之後，靜咗一排，噚日又出動去見市民，不過今次佢老人家唔係去見一般市民，而係去香港小童群益會嘅「童話童心」活動，聽吓小朋友的意見。開頭八方以為小朋友好易搞，原來聽落問題都好「辣」，阿董重大爆細細個已經好大壓力，又叫現代父母千萬咪學佢老竇──船王董浩雲咁教仔！
話說八位兒童問特首細個有乜做人目標，又問佢老竇點對佢，阿董話自己細個冇乜目標，阿爸係識叫佢努力讀書，因為佢係大仔，日後家族生意同細佬妹負擔都交晒畀佢，搞到鬼咁大壓力。佢老竇又係典型嚴父，講嘢一句起兩句止，搞到成日要估估吓，佢重話叫現代父母千萬唔好學佢老竇咁教仔！但係佢話咁樣都有好處，就係唔使「浮嚟浮去」可以集中精神去做事！
﹙圖﹚董建華說香港最近社會風氣不佳，許多青少年自殺，好痛心，希望青少年要努力克服困難。右為胡經昌。
E-mail：