日本萬事得車廠喺最近舉行嘅日內瓦車展上，除展出早前我哋曾於意大利作實地測試嘅全新Mazda6外，場內所展出嘅一部概念車亦備受矚目；佢除咗造型年輕富活力感外，短小精悍嘅身形亦係賣點之一。佢係邊個？之唔係走年輕人路線嘅MXSportRunabout概念車囉。
廠方嘅新聞稿中指出，MXSportRunabout概念車將會係萬事得車廠繼全新Mazda6車系後，另一部新款車系嘅設計平台，並預算新車可於2003年，喺歐洲地區市場推出㖭。話說回頭，新車嘅賣相可謂極富年輕活力感，闊大鬼面罩襯以低斜嘅頭燈組合，令賣相突出吸引外，只有3900mm嘅車長，以及1720mm嘅闊度，亦能令新車響走彎抹角時變得輕鬆容易。至於車廂布局方面，MXSportRunabout除空間寬敞外，車內座椅亦可按閣下需要而收摺放平，而增加尾廂嘅載物容量；另外，車內設備齊全之餘，三幅式跑車軚環及電鍍裝飾，亦能令車廂增添不少跑味㗎。
新車嘅動力係源自一台1.5公升直4引擎，雖然廠方未有公布有關嘅動力輸出數值；但肯定嘅係，廠方將會為呢台引擎注入不少新技術，以求做到有慳油好力嘅表現。各位有興趣嘅車迷，不妨拭目以待喇。