宣萱個性爽朗，她從小便愛湊在男仔堆中玩，但奇怪的是，她入行多年來，除了與張衞健有過一段情，及與現任男友榮文瀚拍拖外，竟成為緋聞絕緣體，即使與撈家及古仔合作無數，也未曾傳過緋聞。宣萱笑言這全都要歸功於螢光幕上的處女拍檔方中信。
宣：未入行前，方中信係我偶像，好多女性都會覺得佢好正。我拍第一套劇《千歲情人》時，就係同佢扮情侶，第一日開工對住佢已經心如鹿撞，但嗰時我啱啱做演員，唔識企位，方中信離遠就用好嚴厲嘅語氣同我講「過嚟啦」，當時我個心諗「點解方中信咁樣嘅」！
好彩第一次拍戲就撞正方中信，令我明白到拍戲嘅時候，你只會愛上對手個角色，而唔係佢本身個人。
我冇緋聞，就真係要多謝方中信，其實後尾識落方中信，至知佢個人係對工作認真至會咁，當時自己新，唔識嘢，但我哋到𠵱家都好好朋友㗎。
記：你冇緋聞，男朋友對你咪好放心？
宣：放心！可能我個樣又唔吸引，冇乜桃花，生活又清淡啦！佢好了解我，知我男性朋友多，但我識得畀乜嘢訊息人哋，我對感情係好清晰嘅，唔會攞嚟煩，因為太傷神啦。
記：好多人覺得你男朋友咁有錢，為乜重要做到咁辛苦，等嫁入豪門好過啦。
宣：我係唔會靠男人，女人一定要獨立，要有自己嘅事業同生活，我好鍾意自己嘅工作，一定會繼續做落去。
記：咁嫁個有錢人係咪你嘅願望？
宣：唔會，有錢冇用㗎，感情至重要，我嘅另一半假使搵唔到錢，我搵到，我養佢囉，唔係問題嚟㗎。兩個人之間要有「情」存在嘅，只係靠錢冇意思㗎。
記：你成日忙拍劇，但你男友唔係做呢行，佢可唔可以體諒到你？
宣：因為我畀到信心佢，佢始終係一個生意人，處事比較淡定同成熟，性格亦都比較冷靜，佢會明白我嘅工作，亦都好體諒我，佢真係好難得。
宣萱去年剛領取潛水牌，但作為潛水初哥，帶齊全套價值萬多元的潛水衣及用具上陣的她，依然要在五名潛水教練護駕下，才敢出海手騰腳震地潛水。宣萱潛了約二十分鐘，上水時凍得全身顫抖，但教練表示宣萱的潛水技術算OK。
喝過熱水後宣萱說：「潛水好玩㗎，可以減壓，亦都係好嘅娛樂，但每次潛完都要做皮膚護理，同埋要好徹底咁洗乾淨啲潛水衣，事後工作都唔少。」