天公不造美，噚日大球場全日落住毛毛細雨，不過，似乎就冇影響入場球迷嘅熱情，好似坐喺南看台嗰邊嘅觀眾，部分男性球迷睇到興起之餘，居然當眾「露械」，更出奇嘅係，女眾觀見到唔覺尷尬之餘，更一齊「露點」俾人影相，真係該煨！
用嚟顯示各隊比數及畀球迷作留言服務嘅分板，噚日可能經唔起黃色暴雨考驗搞到壞咗，不過，經大會工作人員努力搶修，分板最終可以喺傍晚時間「復工」。
相比起首日賽事，噚日大球場入面多咗好多攤位畀球迷享用，其中幫人畫花面嘅攤檔就幾受球迷歡迎，就算佢哋畫全塊面收一百大洋，半塊面收五十咁貴，依然其門如市。
國際級弦樂女子組合BOND，噚日專程去大球場睇波，不過其中兩位就因為爛瞓，留喺酒店唔出球場，但兩位澳洲籍小提琴手，特別嚟捧自己國家隊場，澳洲隊最後當然冇辜負兩位靚女，兩場賽事都大勝而回。