好耐都冇見過宣布供股嘅股票會倒升，唔通真係賀Pansy姐入到澳門旅遊娛樂董事會，成為新一代賭城女大亨？經紀陳話，睇怕信德（242）今次重有得去。
信德今次4供1，每股1元，集資3.88億銀，只係用作還債，並唔係傳聞中增持澳娛股權。
信德噚日復牌，一度跌落最低1.12元，尾市則收1.23元，倒升1.65％。唔好睇小呢個百分比，經紀陳話好有啟示，皆因全日成交中，不停見包銷商同埋星洲經紀力掃，反映佢哋信心十足，另外亦反映後面有人正在做嘢。
經紀陳又引述部分外資行嘅報告，話信德近排由1.44元高位回落至今，現價其實唔算貴，加上新人事新作風，唔排除信德將來真係有機增持會生金蛋嘅澳娛股權，所以投機性買入博得過。
另外，根據過往經驗，賭王系嘅股票炒親波幅都唔細，所以小初亦同意信德現價唔貴。