長和系出咗業績，市場反應唔大，和黃（013）重回升1元，似乎好多人都信超人話3G掂。港股噚日全日悶局拉鋸，恒指收報10863，升33點，成交縮至59.58億元。下周三期指結算，黑客話今個月期指，大戶以好倉底為主，雖然前幾日已經平唔少好倉，但由於成交薄弱，兼冇乜對手，所以平唔切倉，下周應該會頂住個市來結算期指，跟住就會再將個大市推低，然後認購60億元盈富基金（2800）。
信德集團（242）宣布4供1，每股供1元，集資3.885億元。復牌後股價曾下挫7.4%，低見1.12元，不過淡友似乎唔知道此股一向歸邊，公眾持股量唔多，大部分股東都係何生嘅友好，點會咁易跟風沽貨。股價最終反彈收場，收1.23元，升1.65%，後市可能挾多鋪。
光通數網（155）前日停牌，噚日重未可以復牌，據聞又話要供股。Cookie話公司股計劃2供1，每股供1.5仙，集資近１億元，較該股停牌前折讓31.8%。Cookie話佢之前掃咗唔少貨，因為線人話供完股之後重會有大動作跟尾。鼎康御泰陳孝聰最近增持咗23.63%。
據聞話今次供股，主要係陳氏想藉此取得控股權，但唔想提出全面收購。若果要其他股東成全陳氏嘅心願，股價就一定要跌破供股價，令到其他股東冇晒供股意欲，呢次Cookie可能有難。
光通信（603）噚日跌5%，沽壓增大，雖然國泰君安已經力頂，但係似乎淡友仍然佔上風。ｉ師傅話，若果沽壓持續，相信情況唔樂觀。