雖然李超人已經兩次公開話冇做政協副主席呢回事，但係坊間的風仍繼續咁吹。
八方於是問雲大棉究竟有乜新進展？原來李超人呢個星期初，曾經親自致電畀雲老，劈頭第一句就話：「大棉，全世界好多國家畀職位或者封銜我，我都唔接受。」
超人未道來意，雲大棉重醒，第一時間截住超人，叫佢畀兩分鐘時間聽佢講，然後先至話佢啱唔啱。
於是呢位老愛國就向超人曉以大義，大條道理解釋點解政協副主席呢個位唔適合超人。
首先超人𠵱家屬國際著名商人，以呢個身分見江主席同朱總理，大家可以平起平坐，但一做咗政協副主席，就係老江下屬，咁連見面都要批准，咁有乜好呢？
重有，政協有咁多副主席，超人𠵱家先加入，排最尾，排喺霍老馬萬祺同好多人後面，又實在落後啲。
咁多唔好嘢，雲老反問超人需唔需要戴呢頂帽呢？講嚟講去，雲老都係一片苦心，想話畀超人聽唔係想窒住佢，而係真係唔啱佢。
你估超人聽完呢番話嘅反應係點？佢話：「真係好開心，老朋友即係老朋友，雲老想提醒我，想保障我啫。」兩人嘅對話就此結束，最後超人點諗，就只有佢自己知咯。
E-mail：