紅姑離開娛圈後，已甚少留意娛樂新聞，但對早前鬧得滿城風雨的羅兆輝事件，亦略有所聞。
鍾： 其實我都冇細心去睇，不過報紙日日賣，唔多唔少都睇到。我都唔知呢啲新聞係真定係假，講到好似連續劇咁，不過以前我喺娛樂圈咁耐，真係冇乜富豪走嚟同我講，話要包起我。
記： 𠵱家唔使成日見人，係咪買少咗名牌呢？
鍾： 以前做藝人，唔多唔少會比較嘥錢喺服裝方面，𠵱家都好少去名店買衫，你睇我𠵱家着啲衫咁casual就知啦！我覺得一個人着衫要有氣質，唔一定要依靠名牌服裝，反而好睇個人本身嘅氣質。
記： 咁你𠵱家最大開支喺邊方面？
鍾： 去旅行囉！我同老公出埠旅行，對酒店要求會比較講究。咁多年嚟，我哋去過咁多地方玩，始終覺得印度嘅文化、建築物最值得一再飽覽，雖然有人會覺得印度污穢好窮，但我反而覺得印度喺好多方面值得細心欣賞。
好幾年沒有跟紅姑做專訪，想不到她風采依然，老習慣仍然未改，在拍照、訪問結束後，再三叮囑：「拜託揀相嗰陣，幫我睇吓影得我太肥、太老嘅相唔好登呀！咁耐冇影專訪相，我驚自己影得唔夠自然。」