尚德街市位於將軍澳尚德邨內，開業至今只有短短四年零，呢個街市較區內新都城、寶林、景林街市為大，而且因為鄰近屋邨，主要係街坊生意，賣嘅蔬菜、肉食、水果等價錢都好大眾化。尚德街市開業至今，老街坊蔡太已經開始幫襯，小記就搵咗佢為大家引路，有佢帶路實可以買到平靚正蔬果、肉類。
記者：陳冰麗 攝影：關文慧
必行一：
蔡太話每餐必定要有蔬菜，佢幫襯開嘅係呢個菜檔，貪佢種類夠多。而環顧街市，呢個菜檔規模亦係最大，佔兩大個舖位，賣嘅蔬菜亦都好合時，部分蔬菜重提早可以喺度搵到。（新界合成鮮菜69-70號舖）
必行二：
蔡太話因為每日都唔能夠缺少飯後果。而呢個大型果檔更雲集唔少夏天嘅水果。（海記環球鮮果59-60號舖）
必行三：
買餸菜至忌係被呃秤，蔡太話呢個豬肉檔嘅檔主為人夠老實，賣豬肉永遠都唔呃秤，相反間唔中重會斬多咗豬肉而唔另計價錢。蔡太幾乎每日都會煲湯，所以到此例必都會買兩、三件豬骨返去，而佢今晚就會煲西洋菜湯。（鴻威肉枱33號舖）
必行四：
蔡太最後一個目的地係呢個牛肉檔，走到肉枱只叫檔主「唔該半斤牛肉。」而蔡太只係畀咗二十蚊，重有找，原來呢度啲牛肉相當抵，市價每斤要$44，呢度只係$36。而最吸引小記嘅重係呢度啲未經漂白過嘅牛栢葉，夠晒新鮮，食嘅時候零舍安心，重有牛肉丸、牛筋丸，全部都係用人手自製，嚟到必要買啲返去試試。（順景牛肉枱55-56號舖）