雷諾車廠繼早前喺日內瓦車展上，展出如EspaceConcept等多款新車後，廠方最近又公布咗全新Clio四門房車版嘅資料；新車除造型突出外，實用嘅車廂配備及出色嘅性能表現，都係新車嘅賣點之一。
全新Clio四門房車嘅車首造型，與原來嘅Clio小車相近，除擁有相同嘅鬼面罩配搭外，一對頗有神氣嘅頭燈，亦能令人留有深刻印象；而車尾部分則增設有一尾箱，可方便擺放行李之餘，闊大尾燈組合亦可給予尾隨車輛明確提示。至於車廂布局方面，除空間寬敞外，車內設備又見齊全易用，加上承托力甚高嘅座椅，因而令乘坐舒適度倍增。
廠方為顧及用家嘅需要，故此特別為Clio四門房車版提供多個引擎配搭選擇，當中包括有能輸出75匹馬力嘅1.2公升引擎、98匹馬力嘅1.4公升型號，以及107匹嘅1.6公升引擎等等。未知香港代理方面，有無興趣將之引入呢？