香港交易所昨日將二○○－年度年報上網，佢哋十五個董事之中，只有一個收取董事酬金，就係棄官從商嘅行政總裁鄺其志，雖然港交所嘅年度僱員費用下跌咗差唔多一成半，但鄺總嘅酬金總額非但冇縮水，重由二千年度嘅七百四十七萬六千元跳升到八百四十七萬七千元，超越咗證監會主席沈聯濤二○○一年度薪酬七百至七百五十萬元，直迫金管局任總嘅九百至九百五十萬元。
之不過，隨着港交所三月十三日成立薪酬委員會，對董事薪酬與職務是否相配、是否符合市場慣例給予指引，鄺總今年嘅人工能否再創新高就好難講。
佢老哥去年酬金足足加咗一成三，佔港交所五位最高薪人士加薪的八成二，其中薪金、其他津貼及實物收益加幅更達兩成一，即坐底有七百零七萬五千元落袋，花紅方面，就因為港交所去年純利下跌一成半而減少。
E-mail：