再有讀者問何處可以買到桂姐（岑寶桂）嘅大作《卜筮今論》。左丁山唔多知，書局有售啩？如果搵唔到，可以從下列公司攞料：
（一）發行：利通圖書，電話：23031010
（二）出版：玄軒居易學會，電話：23957375；傳真：23911090
另有幾位讀者問債券投資，睇嚟在低息時代，好多人對債券有興趣，啱啱機管局委託滙豐、恒生、渣打、中銀發行零售債券，大家可以去呢四間銀行分行問吓。上次提到（三月十四日）講高息債券，如果去大型美資證券行辦理，好似所羅門美邦嗰位董事總經理（私人客戶投資部）講過，開戶口嘅最低要求係二百萬港紙左右，散戶除咗買債券基金之外，冇乜好辦法。
不過一位讀者就投訴佢買咗「恒生高息債券基金」，回報率竟然係負數，老實講，左丁山唔會知道內裏因由，但按一般推測，去年投資高息債券會虧本，可能係唔好彩買錯咗一啲信貸評級被降低嘅債券，有贏有輸之情況下，拉勻嚟計，不幸得到負數。冇計！
香港債券市場唔發達，債券零售唔夠交投量，只能倚靠銀行。金管局、證監會、港交所應該與發行商、證券行、銀行等有關機構合作，將各類型債券在交易所掛牌，方便散戶入市。金融中心冇債券市場，猶如自斷一臂，啲財金系統高官要想辦法搞掂至算得為稱職。