周潤發夫婦與張曼玉是鍾楚紅圈中最要好的朋友，周潤發曾經說過，紅姑是世上最幸福的女人，丈夫朱家鼎對她百般遷就，對紅姑做任何事都予以無限支持，難怪自稱是幸福阿嬸的紅姑，提起老公便甜絲絲。
鍾： 我同朱家鼎嘅關係，既係夫妻又係朋友，雖然互相好關心同尊重對方，但雙方都會畀對方有啲私人空間，只要我鍾意做嘅事，佢都會支持。可能因為佢係創作人，思想都會好開通，唔會要求老婆留喺屋企煮飯，雖然一般家頭細務我都會做，但我希望婚後生活可以盡量充實。
所以加入地球之友會外，我重學插花、整陶瓷同烹飪，得閒又會約朋友打波，𠵱家嘅生活我過得好開心，覺得好有意思，反而以前日拍夜拍嘅日子係一個噩夢，完全冇私人空間。
記： 由一個當紅女星變作住家婦，難唔難適應？
鍾： 我同老公結婚初期，兩個人出街俾人指指點點，我做咗呢行咁耐，梗係習慣晒，但阿Mike（朱家鼎）就最怕見報，所以佢都好難適應，有次佢重講笑話自己低調咗咁多年，𠵱家成日俾人喺街追住影相，唔知係咪個天要罰佢。
我要做回一個普通人，所以我唔介意攞住環保袋去九龍城街市買菜，去花墟買花，人哋鍾意眼望望，我咪同人笑吓，一般人都好友善。