近期模型界最熱門話題相信都係剛剛到港嘅高達HG系列GP-03D，事關憑住全長1米嘅機身，已足夠號稱史上最大HG模型，比之前出過嘅MIA版除咗更龐大之外，其他各部分設計都有唔少改進。再加埋第一批貨送嘅珍藏「Evolve4」DVD，就算價錢要成千幾蚊，都絕對係收藏高達模型嘅首選。
文、模型製作：姚兆偉攝影：伍慶泉
一打開模型發覺所有配件合共超過500件，全盒模型加埋有成5kg重，確係分量十足。再細心觀察便睇到模型上嘅機械浮雕以及刻線一啲都唔馬虎，十分精細交足功課，而且大部分零件嘅主色都係依據原作設定。唯一缺憾係推進器嘅紅色需要自行噴上，令大家花點工夫。另一方面，由於模型身軀龐大，廠方為免出現頭重腳輕嘅情況，所以特別喺機身正中加上3塊大鐵片，使重心集中喺中央部分，而且更可承托全架機身，以免日子耐咗塑膠會彎曲變形，極之細心。
雖然盒模型成千幾蚊，不過始終都係HG系列，所以同高一級嘅MG比較，模型夾口會多啲，而且更非常之長，筆者喺修補嘅時候都下咗唔少苦功。
雖然今次用咗6日先至完成，不過各個零件嘅打磨以及刻線都做得好好，讓玩家慳番唔少時間，可以噴埋陰影線令效果更佳。另外由於模型太大隻，屋企都冇地方擺，筆者無計可施下惟有將佢寄存於玩具店飾櫃內，各位買咗都要諗吓點樣安置佢。
完成模型後便會發覺，機身上方嘅兩個大型武器庫所收藏嘅機關，比MIA版更為複雜。例如當中唔少得嘅大型集束飛彈以及微型飛彈容器，另外喺兩邊武器庫內均可以拉出兩個空格，作用係收藏GP-03所用嘅各式武器，計有雷射來福槍、摺合式火箭炮、專用護盾，以及喺《機動戰士高達0083星塵回憶》最後之戰中，曾用過嘅高達MK-Ⅱ火箭炮。廠方更特別在各個層格尾部安裝彈弓，同時亦加裝安全扣，於收起時可以鎖穩武器庫，可謂設想周到。
繼上次PG版MK-II嘅「Evolve2」DVD俾人大炒特炒之後，廠方今次再接再厲於第一批貨加送「Evolve4」DVD一隻。內容為一段6分鐘嘅電腦動畫，講述GP-03D用盡身上所有部分消滅自護軍，除咗有用導彈及密集飛彈外，更用平時揸大劍嘅機械臂監生拑死敵人，更甚係用成呎長嘅大型光束炮撞死敵人，相當殘忍，絕對兒童不宜！如果讀者已經擁有之前嘅「Evolve2」，以及散買咗「Evolve1及3」DVD，就一定要有埋呢集，唔好斷纜之餘，集齊一套嘅升值潛力，更係無法估計。
售價：$1,250
售賣點：KANTOHOBBY
地址：旺角信和中心12樓1204室
電話：27710100