明星用乜你用乜，明星着乜你照跟。不知從何時開始，明星已成為潮流指標，而現今女生的潮流指標，相信鄭秀文必入三甲。無論時裝定化妝，記憶所及，佢亦次次穩陣無失手，就算有形象指導幫手，都要自己識分好醜，相信Sammi打扮絕對有心得。問護膚，知佢一定答SKII，問化妝同時裝，又估唔到佢會話最愛女性化打扮兼濃妝，要高貴兼有女人味。
記者：梁珮瑜
攝影：黃子偉
場地提供：萬麗海景酒店皇朝套房
一向畀人爽朗感覺的Sammi，原來本身至愛較為女性化的衣着。「平時T恤波鞋都會着，但始終鍾意女人一點的打扮。自己又最鍾意用頸巾襯衫，鞋就比較鍾意尖頭鞋。」女人得嚟又型仔，永無失手人人讚，是否歸功於形象指導？「都會自己去行吓街買衫，合作開如ThomasChan同余家安都知我鍾意乜，佢哋都會幫我設計或買衫。」咁多數又響邊處Shopping多呢？「除了巴黎米蘭等一定會去，亦鍾意去有特色的地方，好似英國一些跳蚤市場。香港會去邊間？都係去嗰啲囉！」筆者估計，「嗰啲囉！」意指中環Landmark等名店，免賣免費廣告嘛。
講到至愛品牌，Sammi話始終都係CommedesGarcons。「CommedesGarcons的設計好有創意，一嚿嚿又一摺摺好得意，雖然唔係話每季都興，不過我都係最鍾意。另外DriesVanNoten都幾好，感覺好飄同鍾意佢啲花花Pattern。」其實這兩個品牌水準一直好平穩，Sammi支持已有好一段日子。
Sammi自言最怕繁複的護膚程序：「自己好怕煩，唔會有心機搽幾十種嘢上面，其實護膚最緊要係夠乾淨。」Sammi話落妝必用SKII的潔面布，即係佢賣廣告話好似吸塵機嗰隻。咁係咪淨係會用SKII產品呢？「唔係全部都用SKII，不過真係早晚都用佢隻潔面布，自己皮膚比較乾，用完佢就真係好乾淨又唔乾。另外水凝素夜晚會瞓前搽，皮膚感覺充滿水分，上妝都貼啲。」至於鼻樑上的雀斑，Sammi話：「唔會刻意用化妝遮，不過都會盡量淡化佢，唔想佢愈來愈深色。」個人就認為Sammi鼻上的雀斑絕對有型，真的毋須遮掩。
差不多任何妝容都玩過，Sammi話其實自己最鍾意高貴又豔麗的妝容。「白臉、紅唇同條眉夠突出的妝就最鍾意，夠晒豔麗玩嘢。」對於明星來講，經常化妝落妝係指定動作，平時唔使開工就多數唔化妝。但Sammi就話唔化妝都要畫眉、搽睫毛液及唇膏，「化妝都係禮儀的一種，尤其是OL就一定要。」