由BANPRESTO生產嘅《雷朋三世》景品，一睇就知佢哋大玩KUBRICK積木Feel。每個公仔約高2吋，咁細小嘅造型絕對要搞Cutie款才夠吸引；三位主角次元大介、雷朋三世及五衞門，各有Parts附送。正如主角雷朋三世，除送老爺車作配襯外，公仔亦有兩個Body作變身，一個係西裝骨骨嘅扮偵探款，另一個就係長髮生鬚囚犯Look。三位主角咁可愛，而且又係一次賣完唔會再生產嘅景品，玩具迷又要攞錢去入貨喇！
上星期剛到港發售嘅幪面超人龍騎及Knight「R&M」系列活動Figures，大受歡迎。生產商BANDAI今個星期乘勢推出龍騎嘅座駕電單車玩具。喺片集中，Rider龍騎為咗要進入玻璃鏡內嘅別次元世界，就係憑呢架電單車衝入去；此玩具無論外形及上色均與電視片集相近，而電單車長度為11吋，座椅又可以㩒掣彈起，Riders迷買咗龍騎嘅「R&M」系列Figure緊要買埋佢喇！
繼愛美神、美力芭之後，BANDAI生產嘅「超合金魂」系列，今個星期就輪到大鐵牛。首次喺超合金魂登場嘅大鐵牛，由於要跟足動畫中嘅比例，所以身高比之前出嘅鐵甲萬能俠矮細，Size約為5吋高，但因身體部分以金屬製成，所以相當有質感。另外，大鐵牛又附送3個可用磁石連接嘅趣怪面相頭形作替換，所以呢個大鐵牛超合金魂相當好玩。嚟緊超合金魂將會推出戴安娜A及維納斯等女機械人，Fans拭目以待喇！
記者：梁煒健攝影：陳穎
店舖資料
宇宙船
電話：23902708
童夢
電話：27709050