劉青雲、吳鎮宇同埋杜琪峯，前晚出席半島酒店地庫商場嘅法國牌子Lanvin店開幕。三人重分別獲贈一套價值十萬蚊嘅踢死兔。
吳鎮宇話因為佢哋三個代表唔同類型嘅男人，佢自己係浪漫型、劉青雲係家庭型、而杜琪峯就係成熟穩重型，所以先至會搵佢哋做宣傳喎。
杜琪峯透露佢套電影《鎗火》，俾外國公司Intermedia睇中，出五百萬港幣買咗個劇本，遲啲會開拍西片版本，到時佢會幫手做其中一個監製，但會搵乜演員做，同埋會唔會有香港演員就未定。記者問杜琪峯對於最近嘅電影頒獎禮有乜意見時，佢話費事發表，有意見咪盞搞，唔知會惹啲乜嘢禍，所以學精咗唔講嘢喎！
近日忙緊學踢波嘅飛魚王子方力申，噚日出席港台舉辦嘅「倫住嚟試世界盃──足球王子、公主選舉」記者會，並大談自己學踢波嘅感受。
方力申話：「我係足球迷，但只係睇唔玩，亦未接觸過足球，今次有機會由基本學起，學七堂之後就會同一班中學生比賽，今次有機會可以喺工作時間做運動，都幾好㗎。」
亞視噚日喺廣播道總台，為今個月生日嘅藝員舉行生日會，朱慧珊、盧慶輝同珈潁都有出席，一齊慶祝嘅重有四十幾個同事，亞視行政總裁封小平重大派二百蚊利是。問珈潁今年收到乜嘢禮物，佢話：「媽咪送咗個公仔畀我，爹哋就送咗一封四位數字嘅利是畀我。」
台灣人氣組合F4嘅魅力非同凡響，有報道話喺噚日凌晨時份，台灣高雄搜查一艘漁船，船上面有十七名內地偷渡客，其中一個二十幾歲、來自福州嘅女仔，竟然係為咗見偶像F4一面而冒險偷渡。佢被捕時話，佢畀咗二萬幾蚊港幣，喺漁船匿埋咗三日三夜先至嚟到台灣，呢位fans都算瘋狂。
做咗保險從業員三年嘅黎燕珊，前晚喺紅館出席「2002AIAAnnualAwardsPresentation」，佢舊年成績排名全港第十五名，佢話今次獲獎感到好有成就感。
黎燕珊話：「仔女係我精神支柱，證明今時今日女人比男人重強。每次傾成一單大生意，我都會買一份禮物畀自己。」
已有一年冇嚟香港嘅周華健，噚日喺尖沙嘴舉行記者會，宣布將於下月九日喺紅館舉行一場「周華健忘憂慈善演唱會」。
周華健最近正籌備廣東碟，佢話：「我演唱會將請陳綺貞同內地好紅嘅樂隊羽泉做嘉賓，我亦會唱一啲大家由細聽到大，但唔知邊個主唱嘅歌。」