美股杜指周四晚由低位反彈逾百點，跌幅收窄至21點，刺激港股噚日早段反彈，重一度返回50日線（現處10900）之上，可惜升勢只係曇花一現，雖然午市造番好啲，恒指可以升33點收市，但偏淡走勢仍冇改變。
恒指本周埋單跌347點，跌幅3.1%，最差嘅訊號係50日線失守。望吓張恒指周線圖，9RSI跌穿50中軸，但重守住10周線10831，可作為止蝕嘅參考位。
趙飛雲噚日大清倉，將手上嘅股票全部沽出套現，重新部署。其實太平協和（438）曾經有過不俗利潤，可惜冇及早沽貨套利，要倒輸收場。太協升勢已被破壞，要重拾升浪可能要花一段時間，所以先計數。新世界基建（301）噚日睇埋中期業績亦心息，雖然反彈亦沽出。新地（016）兩日急跌8%，噚日唔少大藍籌反彈，但新地只能平收，擺明係弱勢，換馬追隻強勢重好過。