港人北上深圳，主要消費集中於飲食、蒲酒吧Disco及按摩，其中腳底按摩亦為眾多港客的至愛。深圳市腳底按摩中心林立，想突圍而出就要諗諗橋；一間位於東門嘅足浴中心，聲稱首創以中藥生薑作腳底按摩，除咗以生薑蒸腳及浸腳外，更用嚟敷腳㖭，這種做法有助祛風除濕，絕對係保護雙腳嘅最佳方法。此外，店內亦有洗頭、推拿、美容等服務，收費更是又創新低！
記者：梁煒健
攝影：伍慶泉
ImageGirl：毛小倩
未做正式嘅腳底按摩之前，先要用中藥混合生薑片放入木桶嚟蒸雙腳，約蒸10分鐘；由於木桶內有木架承托雙腳，所以達到蒸腳嘅第一個步驟。呢個蒸腳步驟，雖然熱氣相當燙，會令雙腳出汗，但就有消除疲勞之效。
如一般足浴一樣，會以中藥嚟浸腳10分鐘；但其中就加入生薑及其他中藥材在內。
浸完雙腳，就正式做腳底按摩。由腳底做到上去小腿，若做兩個鐘，雙腳會共做按摩約100分鐘。
終於嚟到戲肉，做雙鐘先可以送呢個「敷薑」嘅額外服務。生薑內混合其他如當歸、生熟地及其他藥材，放落雙腳時會先有冰凍感覺，呢個時候大家要忍一忍嘞！
雙腳放上生薑及其他中藥材後，師傅就會用熱毛巾嚟替你蒸焗。剛才敷薑步驟的冰凍感覺隨之消失，這時倒過來覺得熱力非常，未必人人頂得順，不過由於熱力令生薑等滲入雙腳皮膚下層，能達到祛風除濕之效。呢個步驟，需時約15分鐘。
「生薑蒸焗玉腿」之後，自然要用熱毛巾替閣下雙腳清潔，其間當然會做幾分鐘小腿及大髀嘅保健推拿。
雖然未必人人會習慣腳底按摩，加上生薑蒸腳又異常燙熱㖭！不過對於經常在外工作者，生薑足浴無疑夠特別兼可令雙腳消除疲勞防風濕，喜愛足浴嘅朋友不妨一試。
「美健足浴推拿中心」亦有美容、洗頭理髮及全身按摩服務，而且更設有一條龍優惠㖭！家陣呢個一條龍服務，包括1個鐘揼骨、1個鐘腳底按摩、洗頭及美容（包括去死皮、洗面及面部按摩），全套收費?110，女士們可能會覺得非常之抵玩。
美健足浴推拿休閑中心
電話：(86-755)2293806
地址：深圳市東門立新路鴻基工藝城二樓（茂業百貨後面）
營業時間：9:15am至2:00am
交通：從羅湖關口前往，乘的士約5分鐘，車費?12.5。