四十二歲的鍾楚紅（紅姑），息影超過十年，現時過着幸福的婚姻生活，閒來為地球之友宣傳環保訊息，最近為了替該組織籌募經費，更拍了一輯以花為主題的照片，製成慈善卡義賣。而紅姑近日更拍了一個健康美顏產品廣告，fans將可再睹她的風采。
鍾楚紅（紅姑）在七九年加入娛樂圈發展，她憑着漂亮動人的面孔及性感尤物形象，火速成為閃耀紅星。
正當片約源源不絕之際，紅姑在九一年毅然下嫁著名廣告創作人朱家鼎，從此過着幸福小婦人的低調生活。直至十一年後的今天，紅姑才靜極思動，復出接拍MIYURA美顏健康食品廣告，又參與多項地球之友會的籌款活動，她前日接受本報記者專訪時，表示若有令她動容的劇本，她亦不介意再拍電影。
鍾： 鍾楚紅 記： 記者
鍾： 九○年之後我已經冇拍戲，嗰陣雖然係我事業發展高峯期，但我當時可以放棄一切去嫁人，係因為曾經同時拍幾部戲，真係好辛苦，我完全唔覺得拍戲係一種興趣或享受，所以當時遇到合心意嘅對象，自己係完全唔介意結婚嫁人，𠵱家我可以做一個幸福阿嬸，呢啲先係我鍾意過嘅生活。
記： 你咁耐冇做戲，點解最近又會拍廣告？
鍾： 其實喺幾年前我都有拍過力士（沐浴露）廣告，如果個產品我覺得可以推介，我又唔會抗拒接拍，因為拍廣告唔需要太多時間。至於拍戲我都唔係完全抗拒，如果有一個好劇本令我覺得唔拍係損失，再做番戲一啲都唔奇，但𠵱家重未遇到合意嘅港片劇本，不過遲吓我都經常會有曝光機會。
記： 你成日話想做番普通人，點解遲吓要不斷曝光呢？
鍾： 我係地球之友嘅環保大使，對於推動香港嘅環保，我會好積極。最近幾個月我好努力學影相，主要係影花，我大膽將呢批未夠水準嘅作品製成慈善卡發售，一套五款賣六十蚊，到時我會大力做宣傳，希望會有更多善心人買呢啲卡，等地球之友籌到多啲錢，有多啲經費推動環保。
記： 既然你咁鍾意大自然，香港其實唔係咁啱你住。
鍾： 我同老公都喺度搵緊最理想嘅生活地方，香港的確太擠迫，好多地方似石屎森林，而政府不斷填海、拆晒啲有歷史價值嘅建築物，真係好唔應該。香港嘅樹木、草地賣少見少，所以我同老公唔會長時間喺香港住，只要有假期，就會去一啲有大自然嘅地方度假休息。
撰文：陳月媚
攝影：陳志嵐
鳴謝：JudyLeung（化妝）、BenLee（髮型）