唔知係唔係有D檔攤會係今日先開，噚日喺大球場開嘅檔攤明顯比以前少。就連最熱門嘅畫花面重未見到。但係就多咗一檔新嘢係賣美國好流行既「飛天小女警」公仔。其中一個看檔嘅小姐話係睇中七人欖球賽多鬼仔鬼妹參與，預計會大賣喎！
今年繼續有大銀幕留言服務，一個留言重係收一百大元。噚日第一日比賽，生意麻麻，只有十幾則。當然有示愛嘅，有尋人啦。
每年都有好多扮鬼扮馬嘅觀眾搞氣氛，今年最過癮係有啲鬼佬戴住假髮揸住啲吹氣巨型拳套喺場上打來打去，真係拳拳到肉㗎。有啲細路就着住成套神職人員裝束，重好認真話：「我係主教。」
可能係生意難做，發現今年有唔少開喺灣仔嘅酒吧，甚至係開喺九龍城啟德舊機場嘅小型賽車，都喺大球場門口派宣傳單張連折扣卡。佢哋嘅撒手鐧都係派性感﹙係超低胸個隻呢﹚靚女出場，認真落本。
啤酒同啤酒女郎都係七人欖球賽唔少得嘅，今年D啤酒女仔質素似乎唔錯，多數係十零二十歲嘅青春少艾，天氣清涼，但係個個重係着住件緊身無袖短裙，相信生意實唔錯啦。