全球一體化，窮國冇着數，就以股市為例，以美資為主嘅大行，玩遍全世界，而全球股市以美股馬首是瞻，佢哋掌握第一手消息，做乜都佔先機。好似前日大戶預早喺香港沽貨，前晚杜指下跌134點，大戶噚日順勢質多拳，恒指兩日已跌近4百點，你話港股幾難玩！
趙飛雲上個禮拜六提過今個禮拜好大機會出現調整，主要係怕受美股拖累，睇嚟呢個憂慮已出現，杜指噚日跌134點，10日線（現處10568）失守，加上STC%K喺超買區跌穿%D線，啟示調整正開始，港股50日線都穿咗，短期難轉弱為強。
噚日長實（001）及和黃（013）公布業績，和黃盈利較市場預期多二十幾億元，但就冇為3G項目撥備，今日股價都唔慌有驚喜，66元守唔住，有機會見64元，完成小圓頂形態。
講起小圓頂，中移動（941）3月形態都十足十，守得住23元可以博短線反彈。睇見個倉確眼冤，今個禮拜狀態差，反應慢幾拍，失盡沽貨先機，今日再唔掂，都要引刀一快。