恒指再散206點，醒神嘅藍籌唔多，國泰（293）升30仙，兩隻國泰Call輪9140同9247都有進帳，不過咪手痕，追落去唔着數多過着數，因為正股升得嚟好虛，升勢難持久，而啲輪交投唔活躍，數據亦唔靚。
8號仔電盈亦算叻股之一，有1格進帳，收2.05元。熱門電盈Call輪9111跟正股升4.9%，收32仙。
電盈賺18.9億元，比預期好，估計未來股價反覆中向好，但要大升恐怕唔容易，始終要大氣候好景先至有大作為。電盈Call輪呢排低位彈升之後，可以跟正股上落炒波幅，主角仍然係9111，30仙邊邊買入，35仙以上離場。呢個波幅相等於正股2元與2.10元之間。𠵱家正股每波動10仙，大概相等於9111上落5仙，輪價跟1半。
中移動（941）繼續俾美國芬掟，再跌75仙。
中移動已連跌5日，由25.35元散落23.25元，唔見2元有多，有機會技術性反彈，啲中移動Call輪，亦可以細細注揀一兩件博反彈，正選係9044，副選係9029。