歐冠盃賽制過長兼紊亂，搞到分組賽埋尾有太多無意義比賽。好似禮拜三阿仙奴作客祖雲達斯，成場波俾拉科對利華古遜場波嘅戰果牽住嚟踢，我求大俠就愈睇愈㷫，真係火都嚟埋。
唔知係咪聽到場邊提示，當另一邊利華古遜入波，呢邊班阿仙奴球員就冇晒心機，行行企企，似做騷多過比賽；好嘞，當嗰邊傳嚟拉科追番一比二，班阿仙奴球員至有番啲拼勁。據報場波得嗰幾千人睇，成場聽警犬吠多過球迷吶喊，死未？
其實歐洲各國聯賽賽期已經密到唔密，班教練同球員成日炒蝦拆蟹批評歐冠盃比賽太多。咁都算嘞，鬼叫球會同賽會要掠水咩！弊就弊在賽制基本上唔係太理得失球，搞到啲球隊一味計數而唔係進取搵入波，我哋睇波嘅當然冇癮啦。
轉會英甲球隊般尼嘅肥仔嘜加斯居尼真係好識自我陶醉，喺前日佢首次替球隊上陣，只能同巴拉福特打和，不過佢就話自己射嗰個罰球好靚，應該連英格蘭首席龍門施文都擋唔到，唔知點解對手個○仔救到。肥仔嘜，你咪當我咁識波嘅求大俠係流嘅先得㗎！
英超球隊紐卡素嘅球員喺禮拜六對阿仙奴嘅足總盃八強重賽，一定會特別落力。點解？咪因為佢哋唔想俾人睇死囉！話說紐記對兵工廠呢場重賽都未打，但兵工廠嘅官方網已經列出四強對米杜士堡嘅秩序，而米記重同兵工廠斟掂咗到時邊隊着主場球衣。紐記近況雖然麻麻啫，但假假哋都係聯賽四強，兵工廠咁做小心自食其果！
目前養緊傷嘅意大利球星巴治奧，雖然肯定缺席今屆世界盃決賽周，不過冇咗個橙可能執返個桔。據同佢治療嘅醫生蘭尼講，神奇小馬尾喺本月十五號，即係做十字韌帶手術後三十八日已開始跑步，如無意外，喺手術後一百日就可以復出比賽，創造康復最快嘅世界紀錄㖭！我求大俠真係要喺度讚吓巴治奧毅力驚人。
今屆世界盃主辦國之一嘅南韓，實力有幾多大家心中有數，不過佢哋可以話係三十二支決賽周球隊中，有最完善備戰計劃嘅球隊。原來佢嘅荷蘭教練軒迪克喺接手球隊之前已講明，所有選召嘅球員一定要出席集訓，球會冇得托手踭，唔怪得軒迪克佢話：「喺南韓召集球員訓練，就好似喺球會教波叫球員嚟操練咁易，真係爽！」
網隊教練史葛噚日狂插啲NBA球證喺決定完場前一刻嘅入球時亂吹一通，搞到佢哋喺禮拜二對騎士場波完場前臨尾香（對手逾時起手），史葛提議啲NBA球證不如學NCAA咁，喺決定最後一刻嘅入球前，睇吓錄影帶重播先。我求大俠就舉腳贊成呢個建議。大佬啊！就算差佬啲專捉超速嘅雷射槍都出錯啦，何況用肉眼嚟check？