港股兩日跌近400點，恒指可能跌至10400才有較大支持力。和黃（013）公布去年賺120億元，雖較預期為高，可惜未有如市場預期為３G撥備，所以業績唔算好理想，對後市似乎難有支持。
市況開始逆轉，二三線股仍希望盡最大努力抽水，不過抽完水嘅二三線股就係咁俾人掟，其中福方國際（885）沽得最重，股價一度跌近50%。有消息話，先前福方以每股2.95元配售4000萬股，有一大戶以孖展認購唔少數目，但唔知係咪貪心得滯，股價升破3.20元都唔願出貨。
點知股價喺3元樓上捱咗一段時間後，就開始回落，前日破埋配股價，經紀行噚日終於採取行動斬倉，但據聞呢位大戶噚日搵第二間行接番批貨，咁都得？
第一龍浩（875）噚日亦出手配股，每股1.10元，配售股數達2.51億股，由好盈幫佢盡力配售，按道理呢批貨應該重未散出街，但噚日已經跌破配股價，唔知幕後人士需唔需要將股價托高多一次呢？黑客話，未必有此需要，因為此股抽上1.50元樓上時已經有人出過貨，後市重會唔會炒多轉，則要睇大市氣氛如何。
配完股嘅上海置業（1207）開市無耐就跌穿配股價，低見0.96元，不過包銷商最後都將股價頂返上配股價之上，收1元，跌幅收窄至7.4%，成交1.26億元，扣咗9900萬元配售上板交易，其他成交只得2600萬元左右，沽壓唔算大，不過要持續過往升勢，則要先唞唞氣。