二手樓市不時都見到有新低成交，但仍有炒家入市，沙田偉華中心2座低層G室，404方呎，啱啱由炒家斥115萬購入，點解會話佢係炒家，佢打算簽妥合約後就再度放盤，叫價128萬元。利嘉閣地產徐子豪話，因為該單位嘅圖則較罕有，應該炒得起。
中原地產早前講過會加強工商舖部門，噚日佢哋登咗一個全版廣告，列出由去年7月到𠲖家，由中記促成嘅大手租售成交，數吓都有差唔多成40項，睇完就知原來做工商舖都搵到食㗎。
由玩具大王旭日國際蔡志明持有嘅筲箕灣道361號商廈利嘉中心，以一蚊租全層﹙3268方呎﹚優惠作招徠，1、2期單位已全數租出，𠵱家仍以一蚊一層，再推出3期6層招租。由中原獨家代理。
地產代理搶新盤客時，經常發生打鬥衝突事件，間接會嚇怕一些準買家，又影響樓盤形象。為避免同類事件發生，九龍倉﹙004﹚準備推出嘅屯門翠濤居，打算喺海運大廈嘅示範單位門外設黑色界線，要代理排隊輪客，重準備設立一個守秩序獎，頒予最守規矩嘅良好代理。 蘭西