喜歡夜生活又或愛喝兩杯的人，相信都有過開酒吧的念頭，但由於香港舖租貴、人工貴，再加上酒牌難攞，想開酒吧的人，一直得個想字。
不過，阿峰、Reller及阿慶卻把這個夢想，在深圳用六十多萬元實現，套用阿峰的說話：「呢個價錢，喺香港裝修都未夠！」
記者：朱文俊
攝影：林麖鈞
一直都在深圳工作的阿峰，年前認識了在深圳開酒吧的北京人金先生，兩人一見如故，加上阿峰和一班老友，一直以來都有一個心願，就是開一間屬於自己的酒吧，所以跟兩個老友商量過後，今年一月中便在福田區開了這間「@club」。
阿峰說：「同兩個老友傾過，大家都覺得，香港真係無得發圍，而且我哋三個，本身都晚晚蒲，橫掂都要使錢，不如自己開番間搵錢！於是我就拉埋金先生入股，一來佢熟悉酒吧運作，二來有個國內人合資，投資項目變成內地投資，除成本減少外，申領牌照亦容易得多，亦因為金先生與這個業主，本身有生意來往，所以我哋租呢個約三千平方呎嘅單位，都唔使畀上期同按金，呢度又慳番筆。結果佢出三十萬，我哋每人夾十萬左右，齊齊上深圳做老闆。而我就更加拉埋金先生做拍擋，所以喺大陸做嘢，有內地人合作，方便好多。」
一間酒吧的成功，環境、氣氛及服務都非常重要，在這方面，熟悉潮流的香港人，便有用武之地。阿峰說：「由於深圳酒吧畀人感覺都係比較雜，而且成日打交。所以我哋一早就定下目標，酒吧要走高檔路線，全日都只會播放英文歌，我哋亦會安排知名歌手登台演出，好似上星期葉世榮，之前又有趙傳都吸引咗好多客人捧場。呢啲歌手嘅表演費用，可以同金先生另外嗰間吧攤分，因為佢哋一嚟就會去兩間吧表演，費用亦會平啲。
「設計方面，我哋參考咗幾個香港做得幾成功嘅酒吧，最後決定以CyberLook為主題，場中間加一個小型舞台，每晚有專業Dancer跳舞，而且裝修會不停咁變，嚟緊我哋會喺場中間起CatWalk台，每星期搞個不同主題FashionShow，務求令到入嚟嘅客人，時時都有新鮮感。而且大陸都係非常相信名人效應。」
而服務員質素亦係決勝關鍵，金先生累積了自己做生意經驗，採取了一套包食包住制度。金先生說：「要服務員對客人好，首先你要對他們好，所以我們公司服務員的工資比出面高，加上包食包住，而且人手充足，工作不算辛苦，又不用擔心生活，他們對客人才會有好態度。我們希望客人，來我這裏就好像回家一樣。」
對於搞酒吧，三位香港人都是生手，加上對國內申領牌照手續一竅不通，所以從籌劃初期起，他們便定下分工細則。阿峰說：「我哋分工方法好簡單，各自做番自己專長，金先生因為有管理酒吧經驗，所以一切關於牌照申請、公司日常運作、入貨、員工訓練等工作就由佢負責；其中最緊要就係申請牌照，如果你本身冇喺大陸做過生意，包你見到嗰叠申請表，已經嚇死。要搞商業登記，閒閒哋要走十幾個部門。所以好多酒吧明明做得好地地，轉頭就執笠，就係因為批文搞唔清，漏一兩個牌照，俾有關部門封咗，所以呢一Part非常重要。
而我本身在香港是做模特兒代理的，所以經常同模特兒接觸，又同深圳傳媒比較熟，可以安排內地記者做訪問，同埋最緊要係，帶多啲靚女嚟捧場。
而做開旅遊工作嘅Reller就同阿慶負責每星期帶啲香港朋友上嚟幫襯，因為講到消費力，暫時都係香港人比較高。事實證明我哋呢個方法行得通，由籌備到開張都唔使三個月，生意額開始上升，由最初一個月兩三萬元，到𠵱家接近五萬元，我哋有信心到四月會上升到十萬元。
在國內經營酒吧已有一段日子的金先生表示，必須跟足以下12步驟，而經營酒吧更需取到6種批文。
1. 首先投資者需到深圳工商行政管理局，做「政策咨詢」，確定投資項目。
2. 然後要做「企業商號查詢」，取得查詢證明。
3. 齊備相關表格、文件，便可申請領取「名稱核准通知書」。
4. 「立項申請」（是否准許經營該項業務）可到「對外貿易經濟合作局」、「環保處」等部門申報。
5. 得到「立項批准」，按要求準備文件，予「對外貿易經濟合作局」審批。
6. 領取有關批准文件。
7. 再到「工商行政管理局」領取「註冊登記文件」，並按要求填寫齊備。
8. 到「工商行政管理局」遞交註冊登記文件，並取回收據。
9. 預約到遞交文件窗口，取回「營業執照」（商業登記）。
10. 拿營業執照到公安部申請「刻公章」（公司圖章）。
11. 到海關、稅務、勞動等部門辦理手續。
12. 然後才可營業。
1.環保意見書：（向當地環保處申請）
2.文化批文：（向當地文化部門申請）
3.衞生防疫合格證：（向當地衞生部門申請）
4.防火設施許可證：（向當地消防局申請，可由認可消防公司代辦）
5.稅務登記：（向當地稅務局申請）
6.工商批文：（向當地工商行政管理局申請）
所有批文申請，可到工商行政管理局查詢，經營酒吧生意，需特別注意消防設施。最好找消防局「認可的消防工程公司」工作，名單可到消防局查詢。
深圳羅湖區現放寬港人投資限制，毋須像以往一定要與內地人合資，只要年滿十八歲，在羅湖區購置或租用商舖一年或以上；又或在深圳範圍內買樓、在羅湖區內租舖一年，便可合法開舖創業。
投資年份：2002年1月
租金 ?15,000（不需按金上期）
裝修 ?350,000
入貨 ?150,000
人工 ?12,200（經理一名、侍應四名及Dancer兩名）
宿舍 ?1,500
雜項 ?32,000（包括表演費用）
流動資金 ?100,000
投資總額：?660,700
平均每月營業額：?40,000
目標每月營業額：?100,000