真係邪，小初一提華德豐（297），佢噚日就停牌，輸咗唔少錢嘅靚女經紀報料話，真係注晒成件衛星落去，但由於信心盡失，所以佢話復牌都唔睇好。
另外，由於近排多人買殼賣殼，所以好多無厘頭股仔都會郁一輪。好似成年都冇咩成交嘅東強電子（615），近排突然有番成交，由25仙起步炒上，噚日大升12.4％，收45.5仙，升近48.5仙嘅52周高位。
經紀陳話，近排聽人講過東強賣盤事件，但就唔肯定係咪有人一廂情願撩老闆賣殼，定係老闆自己想賣。
雖然隻股升咗咁多，但PE都只係2.7倍，周息率有5.5厘，所以話貴又唔算貴。東強主力做消費電子，但計埋其他生意瓣數都幾多，兼且生意額大，所以就算真係賣盤，要睇數都唔容易，未必咁易賣成，亂炒賣殼風險高。