在《城市論壇》破口大罵楊永強嘅醫生，睇報紙先知佢嘅名叫做馮宜亮。沙田陳師奶認得佢喺沙田第一城開醫務所近二十年，專睇兒科，與另一位醫生許君恕係第一城內最老資格嘅醫生。
港大老友又認得佢係七十年代初港大學生會評議會代表，與陳毓祥對着幹，當年陳毓祥要競選立法局議員，馮宜亮立即與舊友一致行動，包括吳仲賢（已去世），一致倒陳，指陳毓祥係國粹派，陳毓祥後來輸咗，與此不無關係。呢位仁兄可謂老馬有火，星期一上鄭大班節目，繼續大罵醫管局，將來大有資格成為反楊永強先鋒。
講起嚟，公共醫生爭取補假，要求勞資審裁處仲裁，點收科呢？食晏晝時刻，追數K大發議論，認為醫管局輸梗，因為勞工法例寫到明，七日必休一日，一定唔可以用OT補水或獎金嚟支付。追數K對法例咁熟，皆因佢曾代表工人向無良僱主追遣散費。追數K曾代表僱主追僱員，又代表僱員追僱主，經驗非常豐富。
追數K問左丁山：「知唔知乜嘢叫做CustomerAssistance？」唔識噃，customerservice就知係乜啫，追數K話：「對好客服務，自不然係customerservice，對欠錢唔還嘅客戶，以前由收數部（Collection）主理，現在覺得『收數』唔好聽，就稱之為CustomerAssistance（或可譯為客戶輔助），名就好聽啲，功能一樣。」唉，左丁山情願名稱曳啲，經濟好啲咯。