昨日是新聞界一年一度的大日子，報業公會二ＯＯ一年度最佳新聞獎頒獎禮於灣仔君悅舉行，香港報界精英雲集，其中《蘋果》就勇奪八個獎項，攞到圖片組──新聞組冠軍的周志鴻，憑攝下一個跳樓少女全身懸空、僅靠消防員抓緊一頭長髮和右手的驚險一刻，成為雙料冠軍，攞埋圖片組的全年大獎。
而《蘋果》的強項，例如精美的版面設計、充滿動感和美感的新聞相片，都在這次比賽中大出風頭。
講到阿董的致辭，八方發現比往年少咗「新聞自由」，而多咗「人有三急」。阿董冇再提去年煲呔曾出席同一場合都有強調的新聞自由，多咗嘅，就係自佢自動連任以來，已經「急」過三次的「急市民所急」，聽到八方都有啲急，就係急住喺頒獎禮後去問吓佢點睇肥佬黎在台灣被抄查周刊、有冇影響新聞自由等問題。
可惜阿董雖然在致辭中係咁擦傳媒鞋，話新聞界好關鍵，自己會「主動多走幾步」同新聞界解釋溝通，但完場後一眾記者追住阿董問問題，不但被實Ｑ哥哥當係賊咁推開，一句問題都唔答的阿董更加走快幾步鬆人，唔通佢真係咁急？
E-mail：