講起今季十大女士潮流用品，必定要數喱士袋，事關打開日本雜誌你會發現喱士袋無處不在，同樣款式香港未必有得賣，就算有貨都必定勁貴。話晒都係潮流物品，咁貴買番嚟一旦熱潮減退就肯定肉赤兼心痛，小記特此為大家搜羅市面各款靚靚喱士袋，款式包羅萬有，最緊要係全部都係二百蚊以內，用一季都抵。
記者：許穗齡 攝影：陳偉強 Model：BiBifromStarzPeople
3月11日出版的日本《CUTIE》雜誌內，以專題形式介紹了一系列春季人氣袋，當中不乏喱士款式，日本妹都咁追捧，相信好快會成為本地女士們的MustBuy。
喱士一大特點是其豐厚的感覺，正如呢款手抽形的喱士袋，最正係全袋都以印花喱士包面，正面更以三層同款喱士摺出波浪紋，更添層次感。連袋附有一條長帶及一條手挽帶，當小手袋抑或鈄孭袋都悉隨尊便。
牛仔布一向予人狂野活潑的感覺，今次加埋較女性化的白色喱士布，效果又出奇地協調。牛仔布小腰包內附腰帶及長孭繩各一，任你當作小型斜孭袋又或當作腰包使用，款式簡單唔誇張，最適合各位少女們作襯衫之用。
春夏季節，大多女士們都係鍾意用一啲顏色鮮豔嘅手袋，貪佢夠搶眼。好似呢款以鐵鏈為孭帶的喱士袋，袋面以淺姣婆藍作色底，面頭加上一層姣婆紅色的喱士網面，顏色運用大膽，不過效果就真係夠晒搶眼，再加上袋口位的紫色織布邊及黑色皮繩作襯托，的確夠晒In。
用喱士布造袋唔一定誇張老成，好似呢款用銀色鐵鏈作手抽的小手袋就係一個好例子。手袋以淺藍色布造底色，面層以全幅白色喱士布包住，喱士花紋簡單清秀，最啱配襯今季全白Look的打扮。
春天同花似乎有不可分割的關係，因此春季飾物用品大多以花做主題或襯托，好似呢款手挽袋，全袋基本上以淺藍色喱士製成，不過手抽位置附近就加添了立體絲質小花作為陪襯，感覺既有春天氣息又夠晒Cutie。
同樣係以黑色喱士為主，但只要加上另一種藍色作底色，效果就更加搶眼，好似呢款以藍色布底加黑色喱士面的手挽袋，鮮藍色底布就更能突出黑色喱士的通透感，而且兩色互相映襯下令整個袋帶點神秘高貴感又不失斯文。
如果你對黑色喱士始終係情有獨鍾，小記就推介你買呢個以黑色喱士襯黑色牛仔布的手挽袋。以深黑色牛仔布為底，面頭加上呈弧形的波浪紋黑色喱士作裝飾，屬穩陣兼襟興之選。
喱士當然並非少女們的專利，自問成熟大方，不妨考慮吓呢款較高貴的喱士袋。側孭袋以啡色圖案花紋喱士為面，手抽帶則用上金色皮製，最特別當然係袋面的米色珠鏈，襯埋一齊令人感覺更高貴。
Zaco（23011328）
尖沙嘴加連威老道54號W地下
泰寶精品店（28955075）
銅鑼灣金百利UG樓822號舖