李惠敏（Amanda）、何嘉莉、袁潔瑩同鍾鎮濤等，早排一齊拍攝老友記電影投資嘅新片《老友記茶餐廳》，三位女演員喺戲入面扮演三姊妹，而Amanda就扮演大家姐，主力打理家族嘅茶餐廳生意，點知佢俾人整蠱，有人喺茶餐廳放曱甴，搞到Amanda要喺九龍城嘅一個後巷度，拍一場追殺「小強」嘅搞笑戲。
Amanda噚日喺電話度講番呢場戲，忍唔住話：「嗰日喺後巷拍戲都幾辛苦，污糟㗎，又臭，好彩有手套戴住，同埋導演知我嘅宿敵係曱甴，冇搵真曱甴嚟，如果唔係就大件事。」
此外，日前Amanda俾人影到同陳浩民喺銅鑼灣行街嘅照片，話佢哋兩人關係曖昧，Amanda就話：「冇乜嘢啫，同佢熟，正常交往之嘛。」
鍾麗緹﹙Christy﹚最近俾人傳佢就快同個玩Band男友結婚，Christy已經否認咗。不過好多人都唔知佢男友真正嘅中文名，連英文名都搞錯埋。曾有報道話Christy男友叫嚴仲輝，英文名叫阿Jon，其實佢個真名係嚴振翔，英文名都唔係叫阿Jon，正確係阿John，不過Christy覺得感情係私人嘢，一直唔想咁高調，所以即使俾人寫錯咗男友個名，都冇去澄清。
周華健噚日同助手由台北嚟咗香港，佢話已經年幾有多冇嚟香港，今次嚟嘅主要目的係籌備演唱會同搞一慈善活動，華健今個禮拜六會去深圳