如果華朗因腳踭骨裂而要唞八個禮拜，睇嚟曼聯領隊費格遜喺排陣嗰陣唔使再咁傷腦筋嘞。
華朗雖則係曼聯陣中最高身價（成二千八百幾萬鎊）嘅球員，但老實講佢今屆踢成點，大家應該有眼見。呢位阿根廷國腳除咗間唔中射入世界波外，基本上喺曼聯嘅比賽上，都係「行行企企、食飯兩味」，對球隊無乜建樹可言。
雖然係咁，費爵爺費事俾人話佢嘥錢買埋啲唔等使嘅球員返嚟，死都要華朗踢正選；重有呀，佢為咗遷就華朗，就走去學人踢埋啲四五一陣式，但係出嚟嘅效果就唔係咁好，兼且重惡評如潮㖭。
若果華朗真係要唞到季尾，咁即係話老費可以攞正牌唔用佢，你話老費唔Happy就假。
不過，華朗對阿根廷國家隊就非常重要，若然佢真係趕唔切或者冇狀態打世界盃，教練比爾沙肯定頭都大埋，另外重間接益咗喺世界盃同佢哋同組嘅英格蘭㖭！
熱刺喺禮拜一晚場聯賽輸咗畀查爾頓之後，連續第四次輸波，最慘重要俾對方後衞基斯包維串佢哋屎波，話希望可以個個禮拜對佢哋。老實講，呢個世界就係咁，一沉就百踩，如果熱刺唔想再俾人奚落，就惟有爭氣啲。不過，我求大俠亦同時奉勸基斯包維，做人唔好有風使盡𢃇，小心風水輪流轉！
日前聽到巴西前鋒羅馬里奧可能患登革熱病唔踢得世界盃，真係心都實埋，好彩原來係！
中國國家隊教練米路天奴域雖然係歐洲人，不過佢對歐洲足壇就似乎唔多熟悉，話說佢有次接受西班牙記者訪問時，佢竟然話西班牙國家隊目前最大嘅問題係費高有傷！費高係就係喺西班牙踢波，但佢係葡萄牙國腳嚟㗎！究竟米路係太關心中國同組嘅對手而忽略其他國家，定係佢老人家地理知識貧乏呢？
巴西球王比利風流就係人都知，佢重自爆男女都試過，不過美國藥廠Pfizer就可能係睇中佢夠風流，搵佢喺電視上替藥廠嘅威而鋼賣告白，重整咗個銜頭畀比利，叫佢做Pfizer嘅教育大使，任務係喚醒同埋教育其他人要正視陽痿呢個問題，都咪話唔吹脹！
NBA老鬼奧克利個心唔喺公牛度已經係人都知，早幾日球隊影大合照佢冇露面，星期一又冇參加操練，球隊高層打晒鑼，搵埋佢經理人都冇回覆；但公牛有一位唔願透露姓名嘅球員爆料，話奧克利講畀佢聽，奧克利因為幾日前喺侯斯頓俾人偷咗嘢，所以要返去搞掂埋啲手尾，難得公牛高層卡羅斯唔抦佢又唔懷疑佢嘅解釋，重同佢講晒好話。唉！咁又何必啫，雖話求才若渴，但有時合作嘅嘢係你情我願，迫唔嚟㗎。
求驗客手記逢星期一至五刊出
E-mail: