雖然手提電腦三月份正式進入P4-M1.7GHz極速時代，不過賣價一致偏高，未必人人負擔得起，對於真正需要文職工作或出外公幹嘅用家，一部纖巧輕薄，流動性強嘅機種會更為適合。東芝新機PORTEGE2000就專門針對呢類用家而設，機身重量連鋰電1.18kg，厚度更只有14.9mm，放落公事包攞出街都咁瀟灑。
記者、攝影：徐影龍
第一眼望見PORTEGE2000已被其金屬外形所吸引，試機時更感到機身極為纖薄及輕身。厚度只有14.9mm（機後則為19.1mm），能做到如此纖薄，除底板及各類裝置互相配合外，最主要係屏棄手提電腦用嘅傳統2.5"硬碟，改為只得1.8"嘅迷你硬碟，大幅減低機身厚度及重量，放喺背包出外公幹都不會增添太大負擔。不過由於採用迷你硬碟，故此容量只得20GB，儲存大量數碼相片或影像檔案會稍為不足，若是一般文職用途如打字、上網及收發電郵的話，則已足夠有餘。
PORTEGE2000機價$16,980，單以外形可能未算太吸引，不過現在出機可額外獲得三款頗吸引嘅數碼產品，總值差不多達四千蚊，令人感到抵買程度大增，優惠完結期未定。
跟機的標準用量鋰電使用時間約2.8小時，配合高容量鋰電可增至9.3小時，足夠一天工作量，撘長途機時用都冇問題。
呢部MP3Player外形同PORTEGE2000襯到絕，機身亦算小巧。內置64MB記憶體，約可收錄16首MP3音樂，外加記憶卡制式當然採用東芝有份開發嘅SD卡，配合PORTEGE2000嘅SD插槽，下載歌曲話咁易，完全毋須外加讀取器。
機內雖不設任何光碟機，不過在優惠期內可免費獲得，外置式好處在於毋須使用時，可節省攜帶空間及重量，進一步增強流動性。接駁制式為PCMCIA，比USB更為穩定。
外形上搶分，但機能只算一般。處理器採用PIII-M750MHz，新機嚟計唔算快，不過M系列處理器能進一步節省秏電量，對戶外工作者嚟講比速度更重要。預載Windows2000或WindowsXP專業版，為求穩定記憶體不能太少，故此配備256MB主記憶體。較弱係顯示晶片，放棄目前主導市場嘅nVIDIA同ATI產品，採用486年代紅極一時嘅牌子Trident，新晶片名為CyberALADDiN-T，支援4×AGP及硬件式立體加速，內置16MB視像記憶體，雖然同樣地未算頂級，不過一般用途仍是應付有餘。
機身擴充插頭採簡約主義，除特別加入SD記憶卡插槽外，其他的只提供VGA、USB、Ethernet、紅外線等基本插頭，若想接駁對應Parallel、Serial、FireWire等周邊，便要留意東芝稍後推出對應嘅擴充底座了。
抵讚： 機身外形設計的確吸引，尤其重量及厚度更是令人驚喜，對於需要經常出外工作嘅用家，的確非常適合。
要彈： 處理器時脈速度只有750MHz，在「一擊」年代似乎不夠，機身擴充插頭種類少，若想在家中充當桌面電腦用途的話便稍嫌不足。