嘉華地產昨日透露九龍塘豪宅嘉皇臺嘅最新動向，並送上該盤嘅售樓書，本書封面係絨面金色字，夠晒貴氣，成本都唔平。蘭西印象中記得，新地﹙016﹚北角豪廷峯售樓書嘅封面都係一樣。
𠵱家市民睇樓愈嚟愈開心，因發展商送獎品出手闊綽，早前長實﹙001﹚長沙灣泓景臺嘅睇樓送名車抽獎已選出兩位幸運兒，長實今日就搞咗個頒獎禮，順便宣傳樓盤。
豪宅市道今個月好番啲，蘭西聽地產代理講，上半月平均每日有一宗買賣，較上月同期算係好景，但全行做豪宅嘅代理應該唔止15個。
正當中原及美聯兩大地產代理集團，透露今年增加分行大計，但美聯主席黃建業昨日在公布業績同時，卻指𠵱家市場共有1.3萬名從業員，但每月成交量僅得7000宗，預期會有20%從業員會被淘汰。部分小型代理更要面臨結業。
九龍城區一年一度舉辦嘅「私人大廈清潔比賽」，高衞物業管理嘅廣播道星輝豪庭攞咗優異獎。星輝豪庭係豪宅，業主畀嘅管理費都應該唔平，所以大廈響呢方面做得好都係應該嘅，得獎都係順理成章嘅事。
蘭西