一味窩輪：炒油輪提防油價回落

恒指微跌，中移動（941）有美國佬掟貨，散多45仙，兩隻熱門Call輪9029同9044同跌3仙。唔使閉翳住，中移動唔派息嘅影響好快過去，正股會再度帶番起啲Call輪。
美國期油每桶再升0.56美元，油價再度有勢，中海油（883）喺3隻油股中最威，收9.30元，升35仙，創歷史新高。4隻中海油Call輪，平均每隻升幅18%。不過成交麻麻，有1隻交投一片空白。
揀中海油輪，唯一比較易買賣嘅係1762，係去年中由一波發行嘅舊輪，唔係9字頭嗰批。
隻輪8月到期，現價13.8仙，溢價0.9%，槓桿率6.7倍。如果上車，細細注算嘞，提防正股見新高後守唔住，亦要因住油價有獲利回吐。
中石油（857）升1仙，收1.60元。最熱嗰隻Call輪9070，收33仙，升1.5仙。

高息股窩輪負溢價
中石油輪，最正路係9070，明年1月到期，負溢價1.2%，槓桿率4.8倍。點解咁快負溢價？因為正股例派高息，中電Call輪9171有辦你睇。