港股本周成交大縮，市場氣氛都幾悶，講句真，趙飛雲亦全無購買欲，因為暫時搵唔到有值博率嘅股票。
中移動（941）噚日高開低收，恒指亦如影隨形。芬佬口惠而不實，係中移動股價偏軟主要原因，但估計50日線23.70元水平，短期應可守穩，至於中線就要睇收購8省業務嘅價錢及進展。
和黃（013）公布業績前走勢牛皮，其實已算好現象。超人亦係處理市場預期嘅高手，通常業績會較市場預期好，睇吓今次有冇例外。
新地（016）噚日先高後低，市場氣氛平平，冇特別利好消息支持，走勢唔易有突破，聯儲局噚晚加息機會其實好微，應該唔會對新地有影響。
早排上實（363）走勢出現突破，但之後有獲利回吐，噚日下挫3%，收15.50元。上實現時又回落到值得留意嘅水平，50日線15.40元係好淡分界線，至於先前係咪假突破，好快就會知。如果隻股只係升後整固，應該唔會大幅跌穿50日線，係低吸機會，但如確認跌穿，則有機下試14-15元水平。