好耐未碰見地產黃，呢日在興瑋大廈門口相遇，於是行上威靈頓街Starbucks飲杯咖啡。地產黃有見於香港地產低迷已久，好難搵食，於是頻頻北上，流連於上海、深圳，同啲老闆搞策劃，做啲「掃雷」功夫。咁嘅方法搵食，收入都唔曳，但比起以前喺中環去屯門，喺元朗去灣仔，做通天買賣樓宇地皮經紀嗰種「依絲執」，差距大啲噃。
地產黃話：「唔好懷戀過去咯，必須面對現實，夢幻歲月似會一去不復回。」講講吓，佢要左丁山update佢關於一啲黃色要聞，左丁山唔識講，亦冇睇到，無以奉告。地產黃鬧完左丁山唔夠八卦。跟住講啲八卦史嘢畀左丁山聽。話說地產仔想食大茶飯，必須埋身，親近大老細。與大老細玩得埋，一要識賭，二要識一齊玩靚女；前者表示男人氣概，自己亦有「入場費」，唔係靠托；後者就係表示玩得埋一齊，能夠分甘同味，唔會對外人亂咁講嘢，以免傷及本身名譽。
某個地產仔起初只有資格做跑腿啫，點有資格同大老細同枱賭錢？世事就係咁奇，A老細位炒樓代表（即橫手）搵夠咗，自立門戶，於是A老細睇中地產仔夠醒夠撲，收納門下搵佢做新「橫手」，打本畀佢同其他老細賭，等佢建立關係。地產仔自此扶搖直上，不再回頭，點知呢個世界係時勢造英雄，香港從未有人可以敵得過時勢，地產黃深明此理，所以佢唔明點解有啲人會發癲也。